૨૦૨૫ દેશના ઊર્જા ક્ષેત્ર માટે એક નોંધપાત્ર વર્ષ હતું. આ વર્ષે, દેશની સ્વચ્છ ઊર્જા ૨ક્ષમતામાં નોંધપાત્ર વધારો થતા ભારતે સ્વચ્છ ઊર્જા યાત્રામાં રેકોર્ડબ્રેક વધારો નોંધાયો હતો. જેમાં બિન-અશ્મિભૂત ઇંધણ માટેની સ્થાપિત ક્ષમતા ૨૬૬.૭૮ ગીગાવોટ (GW) પહોંચી હતી. જે ૨૦૨૪ ની તુલનામાં ૨૨.૬ ટકાનો વધારો દર્શાવે છે.સૌર ઊર્જાએ આ વૃદ્ધિનું નેતૃત્વ કર્યું હતું, જેમાં સ્થાપિત ક્ષમતા ૨૦૨૪ માં ૯૭.૮૬ ગીગાવોટ થી વધીને ૨૦૨૫ માં ૧૩૫.૮૧ ગીગાવોટ થઈ હતી, જે ૩૮.૮ ટકાનો નોંધપાત્ર વધારો દર્શાવે છે. પવન ઊર્જા ક્ષમતામાં પણ નોંધપાત્ર વૃદ્ધિ જોવા મળી હતી, જે ૪૮.૧૬ ગીગાવોટ થી વધીને ૫૪.૫૧ ગીગાવોટ થઈ હતી, જે ૧૩.૨ ટકાનો વધારો દર્શાવે છે. એકંદરે, સૌર અને પવન ઊર્જાએ આ વર્ષે ભારતના નવીનીકરણીય ઊર્જા વિસ્તરણને આગળ ધપાવ્યું હતું.
અન્ય નવીનીકરણીય ઊર્જા ક્ષેત્રોએ પણ ૨૦૨૫ માં એકંદર વૃદ્ધિમાં નોંધપાત્ર યોગદાન આપ્યું હતું. સ્થાપિત બાયોએનર્જી ક્ષમતા ૧૧.૬૧ ગીગાવોટ સુધી પહોંચી, જેમાં કચરાથી ઊર્જા ઓફ-ગ્રીડ પ્રોજેક્ટ્સમાંથી ૦.૫૫ ગીગાવોટનો સમાવેશ થાય છે, જે સ્વચ્છ ઇંધણ ઉત્પાદન અને કચરા વ્યવસ્થાપનમાં સતત પ્રગતિ દર્શાવે છે.નાની હાઇડ્રો ક્ષમતા વધીને ૫.૧૬ ગીગાવોટ થઈ, જે વિકેન્દ્રિત અને સ્થાનિક નવીનીકરણીય ઊર્જા વિકાસને ટેકો આપે છે. મોટી હાઇડ્રો ક્ષમતા ૫૦.૯૧ ગીગાવોટ હતી, જેમાં ૭,૧૭૫.૬ MW પમ્પ્ડ સ્ટોરેજનો સમાવેશ થાય છે, જે ગ્રીડને સ્થિર કરવામાં અને નવીનીકરણીય ઊર્જાને એકીકૃત કરવામાં મદદ કરે છે.આ પ્રગતિ ભારતને ઊર્જા સુરક્ષા, આબોહવા પરિવર્તન સામે લડવા અને આત્મનિર્ભર ગ્રીન અર્થતંત્ર તરફના માર્ગને વધુ મજબૂત બનાવે છે, જ્યારે ૨૦૩૦ સુધીમાં ૫૦૦ ગીગાવોટ બિન-અશ્મિભૂત ઊર્જા ક્ષમતાના રાષ્ટ્રીય લક્ષ્ય તરફ ઝડપથી આગળ વધી રહી છે.
